വയനാട് ജില്ലയില്‍ 515 പേര്‍ കൂടി നിരീക്ഷണത്തില്‍ വയനാട്
വയനാട്: കോവിഡ് 19 രോഗ പശ്ചാത്തലത്തില്‍ ജില്ലയില്‍ 515 പേര്‍കൂടി നിരീക്ഷണത്തിലായി. 101 പേര്‍ നിരീക്ഷണ കാലാവധി പൂര്‍ത്തിയാക്കി. ഇതോടെ നിലവില്‍ ജില്ലയില്‍ നിരീക്ഷണത്തില്‍ കഴിയുന്നവരുടെ എണ്ണം 1666 ആയി. എട്ട് പേര്‍ ആശുപത്രിയില്‍ നിരീക്ഷണത്തിലാണ്. 678 സാമ്പിളുകള്‍ പരിശോധനയ്ക്ക് അയച്ചതില്‍ 615 എണ്ണത്തിന്റെ ഫലം നെഗറ്റീവ് ആണ്. 53 എണ്ണത്തിന്റെ ഫലം ലഭിക്കാനുണ്ട്. 781 സര്‍വ്വൈലന്‍സ് സാമ്പിളുകള്‍ പരിശോധനയ്ക്ക് അയച്ചതില്‍ 560 എണ്ണത്തിന്റെ ഫലം നെഗറ്റീവ് ആണ്. 221 എണ്ണത്തിന്റെ ഫലം ലഭിക്കാനുണ്ട്.
246 പേര്‍ പ്രവേശിച്ചു
മുത്തങ്ങ ചെക്‌പോസ്റ്റ് വഴി ഇതര സംസ്ഥാനങ്ങളില്‍ നിന്ന് 246 പേര്‍ ജില്ലയില്‍ പ്രവേശിച്ചു. 120 വാഹനങ്ങളും കടത്തിവിട്ടു. ഇതോടെ ഇന്നലെ ഉച്ചയ്ക്ക് ശേഷം മൂന്ന് മണി വരെ പ്രവേശിച്ചവരുടെ എണ്ണം 2567 ആയി.
നാല് പ്രവാസികള്‍ കൂടി തിരിച്ചെത്തി
കോവിഡ് 19 രോഗ പശ്ചാത്തലത്തില്‍ വയനാട്ടുകാരായ നാല് പ്രവാസികള്‍ കൂടി നാട്ടില്‍ തിരിച്ചെത്തി. വെള്ളിയാഴ്ച രാത്രി റിയാദ് – കോഴിക്കോട് വിമാനത്തിലാണ് ഇവര്‍ കരിപ്പൂര്‍ വിമാനത്താവളത്തില്‍ എത്തിയത്. മൂന്ന് പേര്‍ ഗര്‍ഭിണികളാണ്. ഇവര്‍ ടാക്‌സി വാഹനങ്ങളില്‍ സ്വന്തം വീടുകളിലേക്ക് മടങ്ങി. ഒരാളെ മലപ്പുറത്തെ കോവിഡ് കെയര്‍ സെന്ററില്‍ താമസിപ്പിച്ചു. ഇതോടെ ജില്ലയില്‍ തിരിച്ചെത്തിയ പ്രവാസികളുടെ എണ്ണം 23 ആയി. വ്യാഴാഴ്ച എത്തിയ 19 പേരില്‍ രണ്ട് പേര്‍ കല്‍പ്പറ്റയിലെ ഇന്‍സ്റ്റിറ്റിയൂഷണല്‍ കോവിഡ് കെയര്‍ സെന്ററില്‍ കഴിയുന്നുണ്ട്.