ഡല്‍ഹിയില്‍ പടക്ക വില്‍പ്പന നിരോധിച്ചു
ന്യൂഡല്‍ഹി: ദീപാവലിയോടനുബന്ധിച്ചുള്ള പടക്കവില്‍പന ഡല്‍ഹിയില്‍ നിരോധിച്ചു. ദേശീയ ഹരിത ട്രൈബ്യുണലിന്‍റേതാണ് നടപടി. ഇന്ന് അര്‍ധരാത്രി മുതല്‍ ഈ മാസം 30 വരെയാണ് പടക്ക നിരോധനം. ഇതോടെ ദീപാവലിയോട് അനുബന്ധിച്ച്‌ ഇത്തവണ പടക്കങ്ങള്‍ പൊട്ടിക്കാനാവില്ല. പടക്കങ്ങള്‍ വില്‍ക്കാനും വാങ്ങാനും ഉപയോഗിക്കാനും പാടില്ലെന്ന് ഹരിത ട്രൈബ്യുണല്‍ അറിയിച്ചു.
മലിനീകരണ തോത് കൂടുതലുള്ള നഗരങ്ങളില്‍ രണ്ടു മണിക്കൂര്‍ മാത്രമേ പടക്കങ്ങള്‍ ഉപയോഗിക്കുന്നതിന് അനുമതിയുള്ളൂ. ദീപാവലി, ചാത്ത്, പുതുവര്‍ഷം, ക്രിസ്മസ് എന്നീ ആഘോഷങ്ങളിലെല്ലാം ഇതു ബാധകമാണ്. ഈ നഗരങ്ങളില്‍ മാലിന്യം കുറവുള്ള പടക്കങ്ങള്‍ മാത്രമേ വില്‍ക്കാവു എന്നും ട്രൈബ്യൂണല്‍ നിര്‍ദേശിച്ചു.
കോവിഡ് വ്യാപനം കണക്കിലെടുത്ത് നേരത്തേ, രാജസ്ഥാനും ഹരിയാനയും ഉള്‍പ്പെടെയുള്ള സംസ്ഥാനങ്ങളും പടക്കം ഉപയോഗിക്കുന്നത് നിരോധിച്ച്‌ ഉത്തരവിറക്കിയിരുന്നു. ഇതിനു പിന്നാലെയാണ് മലിനീകരണം കണക്കിലെടുത്തുള്ള ഗ്രീന്‍ ട്രൈബ്യൂണലിന്റെ ഉത്തരവ്.