കൊവിഡ് കാലത്തെ മികച്ച നിക്ഷേപം; ഗോള്ഡ് ബോണ്ടിന്റെ അഞ്ചാം ഇഷ്യു നാളെ മുതല്‍, അറിയാം ഇക്കാര്യങ്ങൾ
ഡൽഹി: സർക്കാരിനുവേണ്ടി റിസർവ് ബാങ്ക് പുറത്തിറക്കുന്ന സ്വര്‍ണ നിക്ഷേപ പദ്ധതിയായ സോവറിന്‍ ഗോള്ഡ് ബോണ്ടിന്റെ (എസ്ജിബി) ഈ വർഷത്തെ അഞ്ചാം ഇഷ്യു ആഗസ്റ്റ് മൂന്ന് (തിങ്കളാഴ്ച) മുതൽ ആരംഭിക്കും. അ‍ഞ്ച് ദിവസം നീണ്ടുനിൽക്കുന്ന സബ്സ്‌ക്രിപ്ഷൻ ആഗസ്റ്റ് 7ന് അവസാനിക്കും. ഒരുഒരു ഗ്രാം സ്വര്‍ണത്തിന് 5,334 രൂപയാണ് വിലയെന്ന് റിസർവ് ബാങ്ക് അറിയിച്ചു. കൊവിഡ് കാലത്ത് ആളുകൾ എസ്ജിബി അടക്കമുള്ള ഡിജിറ്റൽ ഗോൾഡ് സ്കീമിനെയാണ് കൂടുതലായും ആശ്രയിച്ചത്. സുരക്ഷിത നിക്ഷേപം എന്ന നിലയ്ക്കാണ് ഈ പ്രതിസന്ധി കാലത്തും ആളുകൾ സ്വർണം കൂടുതലായും വാങ്ങിക്കുന്നത്. ഓൺലൈനായി വാങ്ങുന്നവർക്ക് ഒരു ഗ്രാമിന് 50 രൂപ വരെ കിഴിവ് ലഭിക്കും. അതായത് ഓൺലൈനായി എസ്ജിബിയുടെ അഞ്ചാം ഇഷ്യുവിൽ സ്വർണം വാങ്ങിക്കുമ്പോൾ ഗ്രാമിന് 5,284 രൂപയായിരിക്കും വില.
ഒരു സാമ്പത്തിക വർഷത്തിൽ ആറുതവണയാണ് സോവറിന്‍ ഗോള്ഡ് ബോണ്ട് പുറത്തിറക്കുക. ഈ വര്‍ഷത്തെ സോവറിന്‍ ഗോള്ഡ് ബോണ്ടിന്റെ ആദ്യ ഇഷ്യു ഏപ്രില്‍ 20നും രണ്ടാം ഇഷ്യു മെയ് 11നും മൂന്നാം ഇഷ്യു ജൂൺ 8നും നാലം ഇഷ്യു ജൂലൈ 6നും നടന്നു. നാലാം ഇഷ്യുവിൽ സ്വർണ വില ഗ്രാമിന് 4,852 രൂപയായിരുന്നു. ഇന്ത്യ ബുള്ളിയൻ ആൻഡ് ജ്വല്ലേഴ്‌സ് അസോസിയേഷൻ ലിമിറ്റഡ് പ്രസിദ്ധീകരിച്ച സ്വർണത്തിന്റെ അവസാന ക്ലോസിംഗ് വിലയെ അടിസ്ഥാനമാക്കിയാണ് സ്വർണ്ണ ബോണ്ടുകളുടെ ഇഷ്യു വില നിശ്ചയിച്ചയിക്കുന്നത്.
എത്രവരെ സ്വർണം വാങ്ങിക്കാം?
സർക്കാർ സുരക്ഷിതത്വത്തിൽ സ്വർണം വാങ്ങാനാകുന്ന പദ്ധതിയാണ് സോവറിന്‍ ഗോള്ഡ് ബോണ്ട്. എസ്ജിബി പദ്ധതിപ്രകാരം വ്യക്തികള്‍ക്ക് ഒരു ഗ്രാം മുതൽ പരമാവധി നാലു കിലോഗ്രാം വരെ സ്വർണം വാങ്ങാനാകും. ഒരു സാമ്പത്തിക വർഷത്തിൽ യോഗ്യതയുള്ള സ്ഥാപനങ്ങൾക്ക് 20 കിലോഗ്രാം വരെ നിക്ഷേപിക്കാനാകും. രണ്ടര ശതമാനമാണ് നിക്ഷേപങ്ങള്‍ക്ക് ലഭിക്കുന്ന പലിശ. ഇത് ആറുമാസ ഇടവേളകളിലായി ലഭിക്കും. ഓഹരി വിപണികളില്‍ ട്രേഡ് ചെയ്യാവുന്ന ഈ ബോണ്ടുകള്‍ വായ്പകള്‍ക്കുള്ള ഈടായി നല്‍കാനുമാകും.
മെച്വൂരിറ്റി കാലാവധി
എട്ടു വര്‍ഷ കാലാവധിയുള്ള ബോണ്ടുകൾക്ക് അഞ്ചു വര്‍ഷത്തിനുശേഷം പിന്‍വലിക്കാനുള്ള സൗകര്യവുമുണ്ട്. മെച്യുരിറ്റി സമയത്ത് ബോണ്ടും അതിന്റെ പലിശയും പണമായാണ് തിരികെ ലഭിക്കുക. സ്റ്റോക്ക് എക്സ്ചേഞ്ചുകളിലൂടെ നിക്ഷേപം വിറ്റ് അഞ്ചുവർഷത്തെ ലോക്ക്-ഇൻ കാലയളവിന് മുമ്പായി നിക്ഷേപകന് പദ്ധതി അവസാനിപ്പിക്കാനാകും.
നികുതി
മെച്യൂരിറ്റി കാലാവധി പൂർത്തിയാകുന്നതുവരെ ഗോൾഡ് ബോണ്ടിന് നികുതി ഈടാക്കില്ല. മെച്യൂരിറ്റി കാലാവധി പൂർത്തിയാകുന്നതിന് മുമ്പ് നിക്ഷേപം വിൽക്കുകയാണെങ്കിൽ ഹ്രസ്വകാല-ദീർഘകാല മൂലധന നേട്ടങ്ങൾക്ക് സ്ലാബ് നിരക്കനുസരിച്ച് നികുതി ചുമത്തും. 20.8 ശതമാനം വരെയാണ് നികുതി ഈടാക്കുക.
ആർക്കൊക്കെ വാങ്ങിക്കാനാകും, ആവശ്യമായ രേഖകൾ എന്തൊക്കെ?
ഫോറിൻ എക്സ്ചേഞ്ച് മാനേജ്മെന്റ് ആക്റ്റ് (ഫെമ) പ്രകാരമുള്ള ഇന്ത്യയിലെ ഏതൊരു താമസക്കാരനും എസ്‌ജിബികളിൽ നിക്ഷേപിക്കാം. ഇവരെകൂടാതെ എച്ച്‍യുഎഫ്, ട്രസ്റ്റുകൾ, സർവ്വകലാശാലകൾ, ചാരിറ്റബിൾ സ്ഥാപനങ്ങൾ എന്നിവർക്കും എസ്ജിബി സ്കീം വാങ്ങിക്കാം. വ്യക്തികൾക്കും ഒന്നിൽ കൂടുതൽ ആളുകൾക്കും എസ്ജിബി ഒരുമിച്ച് നിക്ഷേപം നടത്താം.
എന്നാൽ ഒരു എൻ‌ആർ‌ഐക്ക് അഥവാ പ്രവാസിക്ക് ഈ ബോണ്ടുകളിൽ നിക്ഷേപം നടത്താൻ കഴിയില്ല. പക്ഷെ റെസിഡന്റ് നിക്ഷേപകന്റെ നോമിനിയായി ലഭിച്ച ഈ ബോണ്ടുകൾ കൈവശം വയ്ക്കാൻ എൻ‌ആർ‌ഐക്ക് സാധിക്കും. എസ്ജിബി സ്കീം വാങ്ങുന്നതിന് വോട്ടർ ഐഡി, ആധാർ കാർഡ് / പാൻ അല്ലെങ്കിൽ ടാൻ / പാസ്‌പോർട്ട് തുടങ്ങിയ കെ‌വൈ‌സി രേഖകൾ ആവശ്യമാണ്.
എവിടെനിന്നൊക്കെ വാങ്ങിക്കാം?
ബാങ്കുകൾ, സ്റ്റോക്ക് ഹോൾഡിംഗ് കോർപ്പറേഷൻ, പോസ്റ്റ് ഓഫീസുകൾ, അംഗീകൃത സ്റ്റോക്ക് എക്സ്ചേഞ്ചുകൾ, എന്‍എസ്ഇ, ബിഎസ്ഇ എന്നിവ വഴി എസ്ജിബി ബോണ്ടുകൾ വാങ്ങാനാകും. ഇവയുടെ വെബ്‌സൈറ്റുകൾ വഴിയോ ബ്രാഞ്ചുകളിൽ നിന്നോ ഏജന്റുമാരു വഴിയോ ബോണ്ടുകള്‍ ലഭ്യമാകും.