ഒരു മറുക് പോലും സ്കിൻ ക്യാൻസറിന്റെ ലക്ഷണമാകാം, അവഗണിക്കല്ലേ

അടുത്ത തവണ സൺസ്‌ക്രീൻ പുരട്ടുവാൻ നിങ്ങൾ മടി കാണിക്കുമ്പോൾ ഒന്നോർക്കുക, സ്കിൻ കാൻസർ അഥവാ ചർമ്മാർബുദം മുന്നറിയിപ്പ് കൂടാതെയാണ് വരുന്നത്! എന്നിരുന്നാലും, പല തരം ക്യാൻസറുകളിൽ വച്ച് ഏറ്റവും കൂടുതൽ ചികിത്സിച്ച് ഭേദമാക്കാൻ സാധിക്കുന്ന ക്യാൻസറാണ് ചർമ്മാർബുദം. എന്താണ് ചർമ്മാർബുദമെന്നും, അതിൽ നിന്ന് നിങ്ങൾക്ക് എങ്ങനെ സുരക്ഷിതരായി ഇരിക്കാമെന്നും അറിയണമെങ്കിൽ തുടർന്ന് വായിക്കൂ!

സൂര്യന്റെ അൾട്രാവയലറ്റ് (യുവി) കിരണങ്ങളിൽ നിന്നുള്ള ദോഷകരമായ വികിരണമാണ് ചർമ്മ കാൻസറിനുള്ള പ്രധാന കാരണങ്ങളിലൊന്ന്. ഈ പ്രകാശ കിരണങ്ങൾ ചർമ്മകോശങ്ങൾക്ക് കേടുപാടുകൾ വരുത്തുകയും നിങ്ങളുടെ ചർമ്മത്തിന്റെ ആരോഗ്യം ദുർബലപ്പെടുത്തുകയും ചെയ്യും. നിങ്ങൾ ചെയ്യേണ്ടത് ചർമ്മ കാൻസറിനെ തടയുന്നതിനുള്ള സുരക്ഷിതമായ മുൻകരുതലുകൾ എത്രയും വേഗം എടുക്കുക എന്നതാണ്!

അറിഞ്ഞിരിക്കേണ്ട വസ്തുതകൾ

1. ചർമ്മാർബുദം മൂന്ന് തരത്തിൽ ഉണ്ട്

* ബേസൽ സെൽ സ്കിൻ ക്യാൻസർ (Basal Cell Skin Cancer): ഏറ്റവും കൂടുതൽ വെയിൽ കൊള്ളുന്ന ചർമ്മത്തിന്റെ ചില ഭാഗങ്ങളെ ബാധിക്കുന്ന ഏറ്റവും സാധാരണമായ ചർമ്മാർബുദമാണിത്. പ്രാരംഭ ഘട്ടത്തിൽ തന്നെ കണ്ടെത്തിയാൽ ഇത് എളുപ്പത്തിൽ ചികിത്സിച്ച് ബേധമാക്കാം.

* സ്ക്വാമസ് സെൽ സ്കിൻ ക്യാൻസർ (Squamous Cell Skin Cancer): ഇത് സാധാരണയായി പ്രായമായവരെയാണ് ബാധിക്കുന്നതെങ്കിലും, ആദ്യഘട്ടത്തിൽ തന്നെ കണ്ടെത്തി ചികിത്സിക്കാൻ കഴിയും.

* മെലനോമ (Melanoma): ഇത് അത്ര സാധാരണമായി കാണാത്ത ചർമ്മാർബുദമാണെങ്കിലും, ഈ മൂന്ന് തരങ്ങളിൽ വച്ച് ഏറ്റവും മാരകമാണ് മെലനോമ.

2. യൂറോപ്യന്‍ വംശപരമ്പരയില്‍പ്പെട്ടവർക്ക് അപകടസാധ്യത കൂടുതലാണ്

സ്വർണ്ണ വർണ്ണമോ ചുവന്ന നിറത്തിലോ ഉള്ള തലമുടിയുള്ള വെളുത്ത ചർമ്മമുള്ള ആളുകൾക്ക് ചർമ്മാർബുദം വരാനുള്ള സാധ്യത കൂടുതലാണ്. നേരെമറിച്ച്, ആഫ്രിക്കൻ-അമേരിക്കക്കാർ, ഏഷ്യക്കാർ, ലാറ്റിനോക്കാർ എന്നിവർക്ക് ചർമ്മ കാൻസർ വരാനുള്ള സാധ്യത താരതമ്യേന കുറവാണ്. എന്നിരുന്നാലും, ഈ വംശക്കാരെ ബാധിക്കുന്ന തരം ചർമ്മാർബുദം മെലനോമയാണ്. നേരത്തെ സൂചിപ്പിച്ചത് പോലെ, ഏറ്റവും ദോഷകരമായ ചർമ്മാർബുദമാണ് ഇത്!

3. സ്ത്രീകളേക്കാൾ കൂടുതൽ സാധ്യത പുരുഷന്മാർക്ക്

അൻപത് വയസ്സിനു മുകളിലുള്ള പുരുഷന്മാർക്ക് സ്ത്രീകളെ അപേക്ഷിച്ച് ചർമ്മാർബുദം ബാധിക്കാനുള്ള സാധ്യത വളരെ കൂടുതലാണ്. ഈ പ്രായത്തിലുള്ള പുരുഷന്മാരിൽ പ്രോസ്റ്റേറ്റ് കാൻസർ, വൻകുടൽ കാൻസർ, ശ്വാസകോശ അർബുദം എന്നിവയേക്കാൾ ചർമ്മാർബുദം സാധാരണയായി കണ്ടുവരുന്നു.

4. ചില ശരീരഭാഗങ്ങളിൽ മറ്റുള്ളവയേക്കാൾ ഉയർന്ന അപകടസാധ്യത

ചർമ്മാർബുദത്തിന്റെ ഏറ്റവും കഠിനമായ രൂപമായ സെൽ കാർസിനോമ, മുഖത്തിന് ചുറ്റുമുള്ള മൂക്ക്, ചെവി, നെറ്റി, കീഴ്ചുണ്ട് എന്നിവ ലക്ഷ്യമിടുന്നു. എന്നാൽ മെലനോമ ചർമ്മാർബുദം സ്ത്രീകളുടെ കാലുകളിലും പുരുഷന്മാരുടെ പുറംഭാഗത്തുമാണ് കൂടുതലായി കാണപ്പെടുന്നത്.

5. ലക്ഷണങ്ങൾ ശ്രദ്ധിക്കുക

ചർമ്മത്തിന് പുറത്ത് അസ്വാഭാവികമായ രൂപത്തിലോ നിറത്തിലോ വലുപ്പത്തിലോ കാണപ്പെടുന്ന മറുകുകളും പാടുകളും ശ്രദ്ധിക്കുക. ബേസൽ സെൽ‌ കാർ‌സിനോമകൾ‌ ചെറുതും ചുവപ്പ് അല്ലെങ്കിൽ‌ പിങ്ക് നിറത്തിലുള്ള തടിപ്പുകളായി കാണപ്പെടുമ്പോൾ‌, സ്ക്വാമസ് സെൽ‌ ക്യാൻ‌സർ‌ പരുക്കനായതോ അല്ലെങ്കിൽ‌ ശൽക്കങ്ങൾ ഉള്ളതോ ആയിട്ടുള്ള മുഴകളായി വളരുന്നു. അരികുകളിൽ ഒരു ഇഞ്ചിന്റെ നാലിലൊന്നിലും വീതിയിൽ, പല ഭാഗത്തും പല നിറങ്ങളിലായി പ്രത്യക്ഷപ്പെടുന്ന മറുക് മെലനോമയുടെ ലക്ഷണമാണ്.

6. സൺഗ്ലാസുകൾ, കുട, ലിപ്സ്റ്റിക്ക് എന്നിവ ഉപയോഗിക്കുക

പുറത്ത് പോകുമ്പോൾ സൺസ്‌ക്രീനിന് പുറമേ, നല്ല സൺഗ്ലാസുകൾ, ലിപ്സ്റ്റിക്ക്, കുട എന്നിവ ഉപയോഗിച്ച് സ്വയം പരിരക്ഷിക്കുക. സൂര്യന്റെ ഹാനികരമായ അൾട്രാവയലറ്റ് രശ്മികളുടെ ആക്രമണത്തെ 100% തടയാൻ സാധിക്കുന്ന സൺഗ്ലാസുകൾ വിപണിയിൽ ലഭ്യമാണ്. എസ്‌പി‌എഫ് അടങ്ങിയ ലിപ്സ്റ്റിക്കുകളും ലിപ് ബാമുകളും ലഭ്യമായതിനാൽ, ഇവ ചുണ്ടുകൾക്ക് കഠിനമായ സൂര്യ പ്രകാശത്തിൽ നിന്ന് സംരക്ഷണം നൽകുന്നു. സമ്പൂർണ്ണ പരിരക്ഷ ഉറപ്പാക്കാൻ ഒരു കുട കൂടി ഉപയോഗിച്ച് ചർമ്മത്തിന് പൂർണ്ണ സംരക്ഷണം ഉറപ്പാക്കുക.

ചർമ്മാർബുദം മാരകമാണെന്ന് തോന്നാമെങ്കിലും, തുടക്കത്തിൽ തന്നെ കണ്ടുപിടിച്ചാൽ ഇത് വളരെ എളുപ്പത്തിൽ ചികിത്സിച്ച് ബേധമാക്കുവാൻ സാധിക്കുന്നതാണ്. എന്നിരുന്നാലും, പ്രതിരോധം എല്ലായ്പ്പോഴും ചികിത്സയെക്കാൾ നല്ലതാണ്. സൂര്യന്റെ വെയിൽ അധികം ഏൽക്കുന്നത് ഒഴിവാക്കുക. കഠിനമായ സൂര്യ പ്രകാശത്തിൽ നിന്ന് സംരക്ഷണമേകുന്ന വസ്ത്രം ധരിക്കുക, വെയിലുള്ളപ്പോൾ പുറത്തേക്ക് ഇറങ്ങുമ്പോൾ സൺസ്ക്രീൻ പുരട്ടുവാൻ മറക്കരുത്. ചർമ്മാർബുദം എന്താണെന്നും അത് എങ്ങനെ തടയാമെന്നും നിങ്ങളുടെ കുട്ടികളെ ബോധവാന്മാരാക്കുവാനും ശ്രദ്ധിക്കുക. സുരക്ഷിതരായി ഇരിക്കുക!