15 ലക്ഷത്തിനരികെ രാജ്യത്തെ കൊവിഡ് രോഗബാധ; 47,704 പ്രതിദിന രോഗികള്‍
രാജ്യത്ത് കൊവിഡ് കേസുകള്‍ ക്രമാതീതമായി ഉയരുകയാണ്. ഉറവിടം അറിയാത്ത കേസുകളും സമ്പര്‍ക്ക രോഗികളും ഉയരുന്നതാണ് ആശങ്കയ്ക്ക് ഇടയാക്കിയിരിക്കുന്നത്. ഞായറാഴ്ച 48,661 പേര്‍ക്കാണ് രാജ്യത്ത് കൊവിഡ് സ്ഥിരീകരിച്ചത്. 708 പേരാണ് ഞായറാഴ്ച കൊവിഡ് ബാധിച്ച് മരിച്ചത്. അതേസമയം, രാജ്യത്ത് രോഗമുക്തി നേടുന്നവരുടെ എണ്ണത്തില്‍ വര്‍ധനയുണ്ട്. ദക്ഷിണേന്ത്യയില്‍ കൊവിഡ് രോഗികള്‍ ഉയരുകയാണ്. ചില സംസ്ഥാനങ്ങളില്‍ നിശ്ചിത സമയത്തേക്ക് ലോക്ക്ഡൗണ്‍ പ്രഖ്യാപിച്ചിട്ടുണ്ട്. മഹാരാഷ്ട്ര, തമിഴ്‌നാട്, ഡല്‍ഹി, കര്‍ണാടക, ആന്ധ്രാപ്രദേശ് എന്നീ സംസ്ഥാനങ്ങളാണ് രാജ്യത്തെ കൊവിഡ് ബാധിതരുടെ പട്ടികയില്‍ ആദ്യ സ്ഥാനത്തുള്ളത്.
പുതിയ 47,704 കൊവിഡ് കേസുകള്‍
രാജ്യത്ത് 47,704 പ്രതിദിന കൊവിഡ് രോഗബാധ. കഴിഞ്ഞ 24 മണിക്കൂറിനിടെ 654 മരണവും റിപ്പോര്‍ട്ട് ചെയ്തു. രാജ്യത്തെ ആകെ കൊവിഡ് കേസുകള്‍ 14,83,157 ആയി ഉയര്‍ന്നു. 4,96,988 പേരാണ് നിലവില്‍ ആശുപത്രികളിലാണ് ചികിത്സയിലുള്ളത്. 9,52,744 പേര്‍ രോഗമുക്തി നേടി ആശുപത്രി വിട്ടു. 33,425 പേരാണ് കൊവിഡ് മൂലം ജീവന്‍ പൊലിഞ്ഞത്. ആരോഗ്യ മന്ത്രാലയം ആണ് കൊവിഡ് കണക്കുകള്‍ പുറത്തുവിട്ടത്.
Twitter-ANI
പരിശോധിച്ചത് അഞ്ച് ലക്ഷം സാമ്പിളുകള്‍
രാജ്യത്ത് ഇതുവരെയുള്ള കണക്കുകള്‍ പ്രകാരം പരിശോധിച്ചത് 1,73,34,885 സാമ്പിളുകള്‍. രാജ്യത്ത് കൊവിഡ് പരിശോധനയില്‍ വര്‍ധന. ഇന്നലെ മാത്രം രാജ്യത്ത് പരിശോധിച്ചത് 5,28,082 സാമ്പിളുകളാണ്. രണ്ട് ദിവസത്തെ കണക്കുകള്‍ പ്രകാരം പത്തുലക്ഷത്തിലധികം പരിശോധനകളാണ് നടത്തിയത്. ജൂലായ് 26 ന് രാജ്യത്ത് പരിശോധിച്ചത് 5,15,000 സാമ്പിളുകളാണ്. കേന്ദ്ര ആരോഗ്യ- ക്ഷേമ മന്ത്രാലയത്തിന്റേതാണ് റിപ്പോര്‍ട്ട്.
Twitter-ANI
മഹാരാഷ്‌ട്രയിൽ 7924 പുതിയ കേസുകള്‍
രാജ്യത്ത് ഏറ്റവും കൂടുതൽ കൊവിഡ് ബാധിതരുള്ള മഹാരാഷ്‌ട്രയിൽ തിങ്കളാഴ്ച റിപ്പോര്‍ട്ട് ചെയ്തത് 227 മരണങ്ങളും 7924 പുതിയ കേസുകളും ആണ്. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 3,83,723 ആയി ഉയർന്നു. 2,21,944 പേർക്ക് ഇതുവരെ രോഗമുക്തി നേടി. 1,47,592 സജീവ കേസുകളാണ് സംസ്ഥാനത്ത് നിലവിലുള്ളത്. അതേസമയം, മുംബൈ നഗരത്തിൽ കൊവിഡ് ബാധിതരുടെ എണ്ണത്തിൽ വർധന തുടരുകയാണ്. 1,033 പുതിയ കേസുകളും 39 മരണങ്ങളും നഗരത്തിൽ റിപ്പോർട്ട് ചെയ്തു. 1,706 പേർക്ക് രോഗമുക്തിയുണ്ടായി. നഗരത്തിൽ ഇതുവരെ 6129 പേർക്ക് ജീവൻ നഷ്‌ടമായി. 1,10,129 പേർക്കാണ് ഇതുവരെ കൊവിഡ് സ്ഥിരീകരിച്ചത്.
തമിഴ്‌നാട്ടിൽ 6,993 പുതിയ രോഗികള്‍
തമിഴ്‌നാട്ടിൽ 77 കൊവിഡ് മരണങ്ങളും 6993 പുതിയ കേസുകളും ആണ് തിങ്കളാഴ്ച റിപ്പോർട്ട് ചെയ്തത്. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 2,20,716 ആയി ഉയര്‍ന്നു. 5723 പേർ ഇന്നലെ രോഗമുക്തി നേടി. 54,896 സജീവ കേസുകൾ സംസ്ഥാനത്തുണ്ടെന്ന് ആരോഗ്യവകുപ്പ് അറിയിച്ചു. ചെന്നൈ നഗരത്തിലും കൊവിഡ് ബാധിതരുടെ എണ്ണം ഉയർന്ന തോതിലാണ്. സമ്പർക്കത്തിലൂടെയുള്ള കേസുകളും ഉറവിടമറിയാത്ത രോഗബാധിതരുടെ എണ്ണവും നഗരത്തിൽ ഉയർന്ന തോതിലാണെന്ന് കണക്കുകള്‍ വ്യക്തമാക്കുന്നു.
കർണാടകയിൽ ഒരു ലക്ഷം കവിഞ്ഞ് കൊവിഡ് രോഗികൾ
ആശങ്ക വിട്ടൊഴിയാതെ കര്‍ണാടക. സംസ്ഥാനത്ത് കൊവിഡ് ബാധിതരുടെ എണ്ണം ഒരു ലക്ഷം കവിഞ്ഞു. ഇന്നലെ പുതിയതായി 5,324 പുതിയ കൊവിഡ് കേസുകളും 75 മരണങ്ങളും സംസ്ഥാനത്ത് റിപ്പോർട്ട് ചെയ്തു. 61,819 സജീവ കേസുകളാണ് സംസ്ഥാനത്തുള്ളത്. 1,953 പേർക്കാണ് ഇതുവരെ ജീവൻ നഷ്‌ടമായത്. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 1,01,465 ആയി ഉയർന്നു. അതേസമയം, മധ്യപ്രദേശിൽ കഴിഞ്ഞ 24 മണിക്കൂറിനുള്ളിൽ 6,051 പുതിയ കൊവിഡ് കേസുകൾ റിപ്പോർട്ട് ചെയ്തു. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 1,02,349 ആയി. 49,558 പേർ ഇതുവരെ രോഗമുക്തി നേടി. 1090 പേർക്ക് ഇതുവരെ ജീവൻ നഷ്‌ടമായി.
ഡൽഹിയിൽ കൊവിഡ് രോഗികളില്‍ കുറവില്ല
ഡൽഹിയിൽ കൊവിഡ് കേസുകള്‍ കുറഞ്ഞിട്ടുണ്ടെങ്കിലും നിലവിൽ രോഗബാധിതരുടെ എണ്ണത്തിൽ കുറവില്ല. രാജ്യ തലസ്ഥാനത്ത് ഇന്നെല 613 പുതിയ കൊവിഡ് കേസുകളും 26 മരണങ്ങളും റിപ്പോർട്ട് ചെയ്തു. ഇതോടെ സംസ്ഥാനത്തെ ആകെ രോഗബാധിതരുടെ എണ്ണം 1.31 ലക്ഷമായി ഉയർന്നു. 3,853 പേർക്കാണ് ഇതുവരെ ജീവൻ നഷ്‌ടമായത്. ഗുജറാത്തിൽ കഴിഞ്ഞ 24 മണിക്കൂറിനുള്ളിൽ 22 മരണങ്ങളും 1,052 പുതിയ കൊവിഡ് കേസുകളും റിപ്പോർട്ട് ചെയ്തു. 13,146 സജീവ കേസുകൾ നിലവിലുണ്ട്. 41,380 പേർക്ക് ഇതുവരെ രോഗമുക്തിയുണ്ടായി. 2,348 മരണങ്ങൾ ഉൾപ്പെടെ സംസ്ഥാനത്തെ ആകെ രോഗബാധിതരുടെ എണ്ണം 56,874 ആയെന്നും അധികൃതർ അറിയിച്ചു