കിഡ് ഗ്ലോവ്: വിദ്യാർത്ഥികൾക്ക് സൈബർ സുരക്ഷക്കായി ദർശനാത്മക സംരംഭം
കോവിഡ് മഹാമാരി മാറ്റിമറിച്ച ആധുനിക ലോകക്രമത്തിൻ്റെ ഭാഗമായി വിദ്യാഭ്യാസരംഗം ഈ ലേർണിംഗ് എന്ന പുതിയ ചുവടുവയ്പ്പിന് സജ്ജമായിക്കഴിഞ്ഞു.
ക്‌ളാസ് മുറികളിൽ നിന്നും സൈബർലോകത്തേക്ക് പറിച്ചുനടപ്പെടുന്ന വിദ്യാഭ്യാസരീതിയിൽ സൈബർ രംഗത്തെക്കുറിച്ചുള്ള ശരിയായ അവബോധം നമ്മുടെ കുട്ടികൾക്ക് അനിവാര്യമാണ്. വിദ്യാർത്ഥികൾ പുതിയ കാര്യങ്ങൾ പഠിക്കാനും പരീക്ഷിക്കാനും പുതിയ സാങ്കേതികവിദ്യകൾ ഉപയോഗിക്കാനും ഇഷ്ടപ്പെടുന്നു.
പരീക്ഷണം പഠിക്കാനുള്ള ഒരു നല്ല മാർഗമാണെങ്കിലും, സൈബർ സാങ്കേതികവിദ്യയുടെ പ്രതികൂല സ്വാധീനത്തിൽ നിന്ന് സ്വയം പരിരക്ഷിക്കാൻ കുട്ടികൾക്ക് ശരിയായ മാർഗ്ഗനിർദ്ദേശം നൽകേണ്ടത് പ്രധാനമാണ്. സൈബര്‍ ലോകത്ത് സുരക്ഷയും സ്വകാര്യതയും സംരക്ഷിക്കാനും ചതിക്കുഴികളും, ഭീഷണികളും തട്ടിപ്പുകളും തിരിച്ചറിയാനും നമ്മുടെ കുട്ടികളെ പ്രാപ്തരാക്കേണ്ടതുണ്ട്. വിദ്യാര്‍ത്ഥികളെ, സൈബര്‍ ആക്രമണങ്ങളുടെ സാങ്കേതികവശങ്ങളും പ്രത്യാഘാതങ്ങളും നിയമവശങ്ങളും പഠിപ്പിക്കുന്നതിനൊപ്പം ഡിജിറ്റല്‍ സുരക്ഷയിലും അവബോധം നൽകണം.
സൈബര്‍ സുരക്ഷ, തട്ടിപ്പുകൾ, സ്വകാര്യത സംരക്ഷണം എന്നീ മേഖലകളിൽ വിദ്യാർത്ഥികൾക്ക് മാത്രമല്ല അദ്ധ്യാപകർക്കും രക്ഷകർത്താക്കൾക്കും ശരിയായ ദിശാബോധം നൽകുക എന്ന ലക്ഷ്യത്തോടെ സംസ്ഥാനത്ത് കേരള പോലീസിന്റെയും ഇൻഫർമേഷൻ സെക്യൂരിറ്റി റിസർച്ച് അസോസിയേഷന്റെയും (ISRA) സംയുക്താഭിമുഖ്യത്തിൽ ഓസ്‌ട്രേലിയൻ ഇസേഫ്റ്റി കമ്മീഷണറുടെ സഹകരണത്തോടെ നടപ്പിലാക്കുന്ന സംരംഭമാണ് ‘കിഡ് ഗ്ലോവ്’
വിപുലമായ അവബോധം, പരിശീലനം, വിദ്യാഭ്യാസ കാമ്പെയ്‌നുകൾ എന്നിവയിലൂടെ സൈബർ‌സ്‌പെയ്‌സിന്റെ ഭീഷണികളെ നേരിടാനും അവ പരിഹരിക്കാനുമുള്ള അവബോധവും ശേഷിയും സൃഷ്ടിക്കുന്നതിലാണ് കിഡ് ഗ്ലോവ് ശ്രദ്ധ കേന്ദ്രീകരിക്കുന്നത്.
കിഡ് ഗ്ലോവ് ലക്ഷ്യങ്ങൾ:
സൈബർ സുരക്ഷയിൽ ഏർപ്പെടാൻ ആഗ്രഹിക്കുന്ന വിദ്യാർത്ഥികൾക്ക് പ്രോത്സാഹനവും പരിശീലനവും നൽകുക. അർഹരായ വിദ്യാർത്ഥികൾക്ക് നൂതന ഗവേഷണത്തിനും പ്രബന്ധങ്ങൾ പ്രസിദ്ധീകരിക്കുന്നതിനും അവസരങ്ങൾ നൽകുക. സൈബർ സുരക്ഷയിൽ വിദ്യാർത്ഥികളെ പരിശീലിപ്പിക്കുന്നതിന് വിദ്യാലയങ്ങളിൽ ഒരു പഠന വേദി ഒരുക്കുക. പരിശീലനത്തിലൂടെയും ആശയവിനിമയത്തിലൂടെയും വിവര സുരക്ഷയെക്കുറിച്ചുള്ള കാമ്പസ് അവബോധം വർദ്ധിപ്പിക്കുക ഈ സംരംഭത്തിൽ കേരളത്തിലെ എല്ലാ സ്കൂളുകളും രജിസ്റ്റർ ചെയ്ത് 100% സൈബർ സാക്ഷരത കൈവരിക്കുക.