കുട്ടികളുടെ മാനസികാരോഗ്യം ഏതു സമൂഹത്തിൻ്റേയും ഭാവി കരുപ്പിടിപ്പിക്കുന്നതിൽ നിർണായക ഘടകമാണ്.-മുഖ്യ മന്ത്രി

കുട്ടികളുടെ മാനസികാരോഗ്യം ഏതു സമൂഹത്തിൻ്റേയും ഭാവി കരുപ്പിടിപ്പിക്കുന്നതിൽ നിർണായക ഘടകമാണ്. കുടുംബത്തിലും സ്‌കൂളിലുമുള്ള പ്രശ്നങ്ങൾ, മാതാപിതാക്കളുടെ തിരക്ക്, സ്വരച്ചേർച്ചയില്ലായ്മ, പഠനകാര്യങ്ങളിലും മറ്റുമുള്ള സമ്മർദ്ദം എന്നിവയൊക്കെ കുട്ടികളെ പ്രതികൂലമായി ബാധിച്ചേക്കാം. മാതാപിതാക്കളുടെ ഓരോ വാക്കും പ്രവൃത്തിയും നോട്ടക്കുറവും കുട്ടികളിലുണ്ടാക്കുന്ന പ്രശ്നങ്ങൾ നമ്മൾ കാണാതെ പോകരുത്. അവ പരിഹരിച്ച് മുന്നോട്ട് പോകേണ്ടത് അനിവാര്യമാണ്.

ഈ വിഷയം മുൻനിർത്തിയാണ് വനിതാ ശിശു വികസന വകുപ്പിന്റെ നേതൃത്വത്തിൽ രക്ഷാകർതൃത്വം എന്ന വിഷയത്തെക്കുറിച്ചു പൊതുജനങ്ങൾക്കിടയിൽ ഒരു സർവ്വേ നടത്തുകയും അതിനെത്തുടർന്ന് മാതാപിതാക്കൾക്കായി ‘നമുക്ക് വളരാം, നന്നായി വളർത്താം’ എന്ന ഒരു ക്യാമ്പയിൻ ആരംഭിക്കുകയും ചെയ്തത്.

കുട്ടികളെ മാനസികാരോഗ്യവും ആത്മവിശ്വാസവുമുള്ളവരായി വളർത്തുന്നതിന് മാതാപിതാക്കളെ സഹായിക്കുന്നതിനായി, വിദഗ്ധരുടെ സഹായത്തോടെ തയ്യാറാക്കിയ പോസ്റ്ററുകൾ, ഹ്രസ്വചിത്രങ്ങൾ, ഡോക്യൂമെന്ററികൾ എന്നിവ വഴിയാണ് ക്യാമ്പയിൻ ആരംഭിച്ചത്. വളരെ നല്ല പ്രതികരണമാണ് ഈ പദ്ധതിയ്ക്ക് ലഭിച്ചു വരുന്നത്.

ലോകം ഒരു വലിയ പ്രതിസന്ധിയിലൂടെ കടന്നുപോകുകയാണ്. പക്ഷേ, നമ്മുടെ പ്രശ്നങ്ങൾ നമ്മുടെ കുട്ടികളുടെ ഭാവിയിൽ ഒരു പ്രതിസന്ധി സൃഷ്ടിക്കാനിട വരുത്തരുത്. ഈ ലോക്‌ഡൗൺ കാലത്തു പ്രത്യേകിച്ചും നമ്മുടെ കുട്ടികൾക്ക് നമുക്ക് കൂടുതൽ ശ്രദ്ധ നൽകാം.

മുഖ്യ മന്ത്രി പിണറായി വിജയൻ