🌹ജന്മദിനത്തിലെ സ്നേഹവും കരുതലും കരുണയും🙏

ജന്മദിനത്തിലെ സ്നേഹവും കരുതലും കരുണയും

മലങ്കര കത്തോലിക്കാ സഭയുടെ അദ്ധ്യക്ഷൻ മേജർ ആർച്ച് ബിഷപ്പ് കർദ്ദിനാൾ മോറാൻ മോർ ബസേലിയോസ് ക്ലീമീസ് കാതോലിക്കാ ബാവായുടെ അറുപത്തി ഒന്നാം ജന്മദിനമാണിന്ന്

അഭിവന്ദ്യ പിതാവേ അങ്ങയ്ക്ക് ജന്മദിനത്തിൻ്റെ പ്രാർത്ഥനാശംസകൾ സ്നേഹപൂർവ്വം അറിയിക്കുന്നു ഒപ്പം,ഈ എളിയവൻ്റെ ഒരു ഓർമ്മക്കുറിപ്പും.

2016 ഡിസംബർ 10

ആ വർഷത്തെ ക്രിസ്തുമസ്സ് സ്പെഷ്യൽ പ്രോഗ്രാം ഗുഡ്നെസ്സ് ടിവിക്ക് വേണ്ടി ഷുട്ട് ചെയ്യാൻ ഞാൻ അങ്ങയോട് ഡേറ്റ് ആവശ്യപ്പെട്ടിരുന്നു. അങ്ങ് നൽകിയ തീയതിയാണ്. 2016. ഡിസംബർ 10.വെളുപ്പിന് ചാലക്കുടിയിൽ നിന്നും ഞങ്ങൾ പുറപ്പെട്ട് ഉച്ചയോടെ തിരുവന്തപുരത്ത് പട്ടത്തെ തിരുസന്നിധി അരമനയിൽ എത്തി.ഭക്ഷണം എല്ലാം കഴിച്ച്.സെറ്റ് എല്ലാം റെഡിയാക്കി, ഷുട്ടിംങ്ങും പതിവ് പോലെ എല്ലാം ഭംഗിയായി പുർത്തിയാക്കി.

അത് കഴിഞ്ഞപ്പോൾ, പിതാവേ ഒന്ന് പ്രാർത്ഥിക്കണം…..എന്ന് പറഞ്ഞ് ഞാൻ അങ്ങയുടെ മുൻപിൽ മുട്ട് കുത്തി.അതിനെന്താ എന്ന് പറഞ്ഞ് അങ്ങയുടെ കരങ്ങൾ എൻ്റെ ശിരസ്സിൽ വച്ചു. അപ്പോൾ, ഞാൻ പറഞ്ഞു. ഇന്ന് എൻ്റെ ജന്മദിനമാണ്.ഓഹോ.. എന്നിട്ട് ഇപ്പോഴാണോ പറയുന്നത് എന്ന് ചിരിയോടെ പറഞ്ഞ്, അങ്ങ് തീഷ്ണമായി പ്രാർത്ഥിച്ചു.(അങ്ങയുടെ പ്രോഗ്രാം പല തവണ ഞാൻ ഷുട്ട് ചെയ്തിട്ടുണ്ട്. കണ്ടിട്ടും സംസാരിച്ചിട്ടും ഉണ്ട്. അപ്പോഴൊന്നും അങ്ങയോട് എനിക്ക് വേണ്ടി പ്രാർത്ഥിക്കണം എന്ന് ഞാൻ ആവശ്യപ്പെട്ടിരുന്നില്ല.)

പ്രാർത്ഥന കഴിഞ്ഞ്, ഒന്ന് രണ്ട് കാര്യങ്ങൾ സംസാരിച്ച് അങ്ങ് ഞങ്ങൾക്ക് അടുത്ത് തന്നെ ഉണ്ടായിരുന്നതും ഞാൻ ഓർക്കുന്നു. പത്ത് മിനിറ്റിനകം.ഷൂട്ടിംങ്ങ് ക്രമീകരണങ്ങൾ എല്ലാം ഒതുക്കി ഞങ്ങൾ തിരിച്ചു പോരുവാൻ തയ്യാറാകുമ്പോൾ, അങ്ങ് തന്നെ ഞങ്ങളോട് പറഞ്ഞു. ആൻ്റണി വരു… കാപ്പി കുടിച്ചിട്ട് പോകാം. അങ്ങയ്ക്കൊപ്പം ഡൈനിംങ്ങ് ഹോളിൽ എത്തുമ്പോൾ, അവിടെ, നാലഞ്ച് അച്ചന്മാരും 6,7 ബ്രദേഴ്സും ഉണ്ടായിരുന്നു.അവർ കാത്ത് നില്ക്കുകയായിരുന്നു.അവർക്കടുത്ത് എത്തിയപ്പോൾ അവരോടായി അങ്ങ് പറഞ്ഞു

. ഇന്ന് നമ്മുടെ ആൻ്റണിയുടെ ബർത്ത് ഡേയാണ്. അതൊന്ന് ആഘോഷിക്കണ്ടേ.. എന്ന്, അപ്പോഴെക്കും, മൂടിവച്ചിരുന്ന ഒരു പ്ലേറ്റ് ഒരു ബ്രദർ തുറന്നു. അതിൽ വച്ചിരുന്ന കേക്കിൽ Happy birthday Antony. എന്ന് എഴുതിയിരുന്നു.അത് എന്നെ മാത്രമല്ല. എൻ്റെ ക്രു മെമ്പേഴ്സിനെയും അത്ഭുതപ്പെടുത്തി. അങ്ങ് തന്നെ രണ്ട് വാക്കിൽ ഒരാശംസയും എനിക്കായി പറഞ്ഞു.കേക്ക് മുറിച്ച് എൻ്റെ വായിൽ ഒരു പീസ് വച്ചു തന്നു. മറ്റുള്ളവർക്കും അങ്ങ് തന്നെ നൽകി.

അഭിവന്ദ്യ പിതാവേ, അങ്ങയുടെ ഈ സ്നേഹം കരുതൽ കാരുണ്യം അത് ഞങ്ങൾ തിരിച്ചറിയുന്നു.ഇത്തരം, ചെറിയ കാര്യങ്ങളിൽ പോലും അങ്ങ് കാണിക്കുന്ന വലിയ ശ്രദ്ധയാണ്. അങ്ങയുടെ മഹത്വം. അങ്ങ്, ആ.. കേക്ക് മുറിക്കൽ ക്രമീകരിച്ചില്ലെങ്കിലും എനിക്ക് ഒരു ബുദ്ധിമുട്ടും ഉണ്ടാകുമായിരുന്നില്ല. അങ്ങ് ശിരസ്സിൽ കൈവച്ച് പ്രാർത്ഥിച്ചപ്പോൾ തന്നെ ഞാൻ സന്തോഷവാനായിരുന്നു.എന്നിട്ടും, നിമിഷങ്ങൾ കൊണ്ട് എന്നെയും സംഘത്തെയും കുടുതൽ ആഹ്ളാദഭരിതരാക്കി.

പ്രീയ പിതാവേ, അങ്ങയുടെ ജന്മദിനം ആഘോഷിക്കുന്ന ഈ നല്ല ദിനത്തിൽ, എൻ്റെ ജന്മദിനത്തിൽ അങ്ങു കാണിച്ച ആ നന്മ ഒന്ന് പറയാതെ പോയാൽ, അതൊരു നന്ദികേടാകും എന്ന് എൻ്റെ മനസ്സ് പറഞ്ഞു. അതിനാൽ, അന്നത്തെ ചിത്രങ്ങളും ഈ മുഖപുസ്തകത്തിൽ ഞാൻ പങ്ക് വയ്ക്കുന്നു.

ഇനിയും, ഒരു പാട് മുഹുർത്തങ്ങൾ മനസ്സിലുണ്ട്. അത് മറ്റൊരിക്കൽ കുറിക്കാം.അഭിവന്ദ്യ പിതാവേ.. ഒരിക്കൽ കുടി അങ്ങയ്ക്ക് ജന്മദിനാശംസകൾ ഹൃദയപുർവ്വം ആശംസിക്കുന്നു

Antony kandamparambil. Goodness TV.