രാജ്യത്തെ ഏറ്റവും മികച്ച 50 എം.എല്‍.എമാരില്‍ വിടി ബല്‍റാമും
ന്യൂഡല്‍ഹി: രാജ്യത്തെ മികച്ച 50 എംഎല്‍എമാരുടെ പട്ടികയില്‍ തൃത്താലയുടെ ജനപ്രതിനിധി വിടി ബല്‍റാമും. മികച്ച സാമാജികരെ കണ്ടെത്താനുള്ള ഓണ്‍ലൈന്‍ സര്‍വേയില്‍ കേരളത്തില്‍ നിന്ന് ആകെ ഇടം നേടിയത് വി ടി ബല്‍റാം മാത്രമാണ്. ഫെയിം ഇന്ത്യ ഏഷ്യ പോസ്റ്റ് എന്ന മാഗസിന്‍ നടത്തിയ ഓണ്‍ലൈന്‍ സര്‍വേയിലാണ് രാജ്യത്തെ മികച്ച അമ്ബത് എംഎല്‍എമാരുടെ പട്ടികയില്‍ വി ടി ബല്‍റാമും ഇടംപിടിച്ചത്. രാജ്യത്തെ 3958 എംഎല്‍എമാരില്‍ നിന്നാണ് തിരഞ്ഞെടുപ്പ് നടത്തിയത്.
31 നിയമസഭകളിലായി 4123 സാമാജികന്മാരാണ് രാജ്യത്തുള്ളത്. എന്നാല്‍ വിവിധ കാരണങ്ങള്‍കൊണ്ട് 165 എംഎല്‍എ സീറ്റുകള്‍ ഒഴിഞ്ഞുകിടപ്പാണ്. ഓണ്‍ലൈന്‍, ഡാറ്റ അനലിറ്റ്ക്സ് എന്നിവയുടെ അടിസ്ഥാനത്തിലായിരുന്നു സര്‍വെ. അവസാന റൗണ്ടില്‍ 150 എംഎല്‍എമാരാണ് എത്തിയത്. ഇവരുടെ പ്രവര്‍ത്തനങ്ങള്‍ ഡാറ്റാ അനലിറ്റ്ക്സ് ഉപയോഗിച്ച്‌ വിലയിരുത്തിയാണ് അവസാന 50 പേരെ തിരഞ്ഞെടുത്തത്. നിയമസഭകളിലെ പങ്കാളിത്തം, മണ്ഡലങ്ങളിലെ പ്രവര്‍ത്തനം, ചര്‍ച്ചകളിലെ പങ്കാളിത്തം ഇവ ഡാറ്റാ അനലിറ്റ്ക്സിലൂടെയും പരിശോധിച്ചു.
50 വിഭാഗങ്ങളിലായാണ് എംഎല്‍എമാരെ തിരഞ്ഞെടുത്തിരിക്കുന്നത്. ഇതില്‍ ബാസിഗര്‍ എന്ന വിഭാഗത്തിലാണ് വിടി ബല്‍റാം. ജനപ്രീതി, പ്രവര്‍ത്തന ശൈലി, പ്രതിബദ്ധത, സാമൂഹിക ഇടപെടല്‍, ജനങ്ങളിലുള്ള സ്വാധീനം, പൊതുതാത്പര്യം, പ്രതിച്ഛായ, അവതരിപ്പിച്ച ബില്ലുകള്‍, എംഎല്‍എ ഫണ്ടിന്റെ ഉപയോഗം, നിയമ സഭയിലെ സാന്നിധ്യം ചര്‍ച്ച തുടങ്ങിയവയും സര്‍വേയില്‍ വിലയിരുത്തി.