അഭിവന്ദ്യ ഡോ. മാർ അപ്രേം മെത്രാപ്പോലീത്ത:സംപ്രാപ്യതയുടെ മാർഗ്ഗദർശ്ശി

ഇന്ത്യൻ ക്രൈസ്തവ ചരിത്രത്തിലെ നിസ്തുല വ്യക്തിത്വങ്ങളിൽ ഒരാളായിരുന്നു അഭിവന്ദ്യ ഡോ. മാർ അപ്രേം മെത്രാപ്പോലീത്ത.

അസ്സീറിയൻ ചർച്ചിന്റെ തൃശ്ശൂർ കേന്ദ്രമാക്കി പ്രവർത്തിക്കുന്ന കൽദായ സുറിയാനി സഭയുടെ മെത്രാപ്പോലീത്തയായി സേവനമനുഷ്ഠിച്ച അദ്ദേഹത്തിന്റെ വിയോഗം, സൗഹൃദത്തിന്റെയും, അറിവിൻ്റെയും ആത്മീയതയുടെയും ലോകത്തിന് നികത്താനാവാത്ത ഒരു വിടവാണ് സമ്മാനിക്കുന്നത്. 1940 ജൂൺ 13-ന് തൃശ്ശൂർ മൂക്കൻ ഫാമിലിയിൽ ദേവസി-കൊച്ചുമറിയം ദമ്പതികളുടെ പത്ത് മക്കളിൽ നാലാമനായി ജോർജ്ജ് ഡേവിസ് മൂക്കൻ എന്ന പേരിൽ ജനിച്ച അദ്ദേഹം, ഇരുപത്തിയെട്ടാം വയസ്സിൽ മെത്രാപ്പോലീത്തയായി അവരോധിതനാകുമ്പോൾ, ഭാരതത്തിലെ തന്നെ ഏറ്റവും പ്രായംകുറഞ്ഞ രണ്ടാമത്തെ മെത്രാപ്പോലീത്ത എന്ന സ്ഥാനത്തിന് അർഹനാവുകയായിരുന്നു. കൃത്യതയാർന്ന സഭാഭരണ നിർവ്വഹണത്തിലൂടെയും, അതിവിപുലവും ബഹുമുഖവുമായ സാഹിത്യ സൃഷ്ടികളിലൂടെയും, പണ്ഡിതോചിതമായ സരസ പ്രഭാഷണങ്ങളിലൂടെയും, എളിമയും ലാളിത്യവും നിറഞ്ഞ ജീവിതത്തിലൂടെയുമാണ് അദ്ദേഹം ലബ്ധ പ്രതിഷ്ഠ നേടിയത്. ഏഴുപതിലധികം ഗ്രന്ഥങ്ങൾ രചിച്ച മാർ അപ്രേമിൻ്റെ എഴുത്തുകൾ അറിവിന്റെ ആഴങ്ങളെയും, ആത്മീയതയുടെ ഉയരങ്ങളെയും, സാധാരണ ജീവിതത്തിലെ നർമ്മത്തെയും ഒരുപോലെ ഉൾക്കൊണ്ടു. സഭാചരിത്രപണ്ഡിതൻ, ജീവചരിത്രകാരൻ, യാത്രാവിവരണകാരൻ, നർമ്മസാഹിത്യകാരൻ, ഭക്തിഗീതരചയിതാവ് എന്നീ നിരവധി നിലകളിൽ അദ്ദേഹം ഖ്യാതി നേടിയിട്ടുണ്ട്. അദ്ദേഹത്തിന്റെ Nestorian Missions, The Council of Ephesus of 431 AD, The Nestorian Fathers തുടങ്ങിയ ഗ്രന്ഥങ്ങൾ ലോകമെമ്പാടുമുള്ള സഭാചരിത്രപണ്ഡിതരുടെ ശ്രദ്ധ നേടി. ഈ കൃതികൾ അസ്സീറിയൻ സഭയുടെ പ്രാരംഭകാല ചരിത്രം, അതിന്റെ വിശാലമായ ദൗത്യപ്രവർത്തനങ്ങൾ, വേദശാസ്ത്രപരമായ നിലപാടുകൾ എന്നിവയെക്കുറിച്ച് ആഴത്തിലുള്ള വിശകലനങ്ങൾ നൽകുന്നു. അക്കാദമിക തലത്തിൽ ഈ ഗ്രന്ഥങ്ങൾ ഇന്നും വലിയ പ്രാധാന്യത്തോടെയാണ് വായിക്കപ്പെടുന്നത്. ഓരോ ജന്മദിനത്തിലും ഓരോ പുസ്തകങ്ങൾ പുറത്തിറക്കുക എന്ന അദ്ദേഹത്തിന്റെ ശീലം, അറിവിനോടുള്ള അടങ്ങാത്ത ദാഹത്തെയും അത് സമൂഹത്തിന് പകർന്നു നൽകാനുള്ള പ്രതിബദ്ധതയെയും എടുത്തു കാണിക്കുന്നു.

ആ പ്രതിഭാധനൻ ഒരു ഭക്തിഗീതരചയിതാവായും സമൂഹത്തിൽ വലിയ സ്വാധീനം ചെലുത്തി. ആൾ ഇന്ത്യ റേഡിയോയിൽ അദ്ദേഹത്തിന്റെ ഭക്തിഗാനങ്ങൾ പ്രക്ഷേപണം ചെയ്തിട്ടുണ്ട്. “കാൽവരി ക്രൂശെ നോക്കി ഞാൻ” (Behold the Cross of Calvary) എന്നു തുടങ്ങുന്ന അദ്ദേഹത്തിന്റെ ഗാനം 50 ഇന്ത്യൻ ഭാഷകളിലേക്കും 50 വിദേശ ഭാഷകളിലേക്കും തർജ്ജമ ചെയ്യപ്പെട്ട്, ലോകമെമ്പാടുമുള്ള ക്രിസ്ത്യാനികളുടെ ഭക്തിയെ പ്രചോദിപ്പിച്ചിട്ടുണ്ട്. 2007-ൽ ആലാഹ (God) എന്ന പേരിൽ, മാർ അപ്രേം ചിട്ടപ്പെടുത്തിയ 16 ഗാനങ്ങൾ അടങ്ങിയ ഒരു ആൽബം പുറത്തിറക്കി. സംഗീത ആസ്വാദകനായിരുന്ന അദ്ദേഹം തിരക്കുകൾക്കിടയിലും സിത്താർ, കീബോർഡ് എന്നിവ പഠിക്കാൻ ശ്രമിച്ചു എന്നത് അദ്ദേഹത്തിന്റെ വൈവിധ്യമാർന്ന കഴിവുകളെയും താൽപ്പര്യങ്ങളെയും എടുത്തു കാണിക്കുന്നു.

മാർ അപ്രേമിന്റെ സംഭാവനകൾക്ക് ദേശീയ-അന്തർദേശീയ തലത്തിൽ വലിയ അംഗീകാരങ്ങൾ ലഭിച്ചു. അദ്ദേഹത്തിന്റെ ബഹുമുഖ പ്രതിഭയെയും സേവനങ്ങളെയും ഈ പുരസ്കാരങ്ങൾ അടിവരയിട്ടുറപ്പിക്കുന്നു:

1. കേംബ്രിഡ്ജ് ഇന്റർനാഷണൽ ബയോഗ്രാഫിക്കൽ സെന്ററിന്റെ ‘മാൻ ഓഫ് അച്ചീവ്മെന്റ് അവാർഡ്’ (1984). ലോകമെമ്പാടുമുള്ള പ്രമുഖരായ വ്യക്തികൾക്ക് നൽകുന്ന ഈ പുരസ്കാരം അദ്ദേഹത്തിന്റെ അതുല്യമായ നേട്ടങ്ങളെ അംഗീകരിച്ചു.

2. കോപ്റ്റിക് ഓർത്തഡോക്സ് കൾച്ചറൽ സെന്റർ, വെനീസ് നൽകിയ ‘മെഡൽ ഓഫ് മെറിറ്റ്’ അദ്ദേഹത്തിന്റെ സാംസ്കാരികവും എക്യുമെനിക്കലുമായ അനുഭവങ്ങൾക്ക് ലഭിച്ച അംഗീകാരമാണ്.

3. തൃശ്ശൂർ റോട്ടറി ക്ലബ്ബിന്റെ ‘ലിറ്റററി അവാർഡ്’ (1990).

4. ന്യൂഡൽഹി ആസ്ഥാനമായുള്ള ISPCK (Indian Society for Promoting Christian Knowledge) എന്ന പ്രസാധക സ്ഥാപനത്തിന്റെ എഴുത്ത് മത്സരത്തിൽ അദ്ദേഹത്തിന് ലഭിച്ച ഗോൾഡൻ അവാർഡ്. സമ്മാനാർഹമായ ഈ ലേഖനം ”Adoption Abroad” എന്ന പേരിൽ 1991-ൽ അവർ പ്രസിദ്ധീകരിച്ചു.

5. വേൾഡ് വൈഡ് അവാർഡ് ഓഫ് തൃശ്ശൂർ (1991).

6. ക്രൈസ്തവ സാഹിത്യ അക്കാദമിയുടെ ‘വില്യം കേറി അവാർഡ്’.

7. മികച്ച എക്യൂമെനിക്കൽ പ്രവർത്തകനുള്ള തൃശ്ശൂർ എക്യൂമെനിക്കൽ ഗ്രൂപ്പിന്റെ’ അവാർഡ് എന്നിവ ആ പിതാവിൻ്റെ നേട്ടങ്ങളുടെ പട്ടികയിൽ ഉൾപ്പെടുന്നു.

തിരുമേനിയെക്കുറിച്ചുള്ള ജീവചരിത്രപരമായ വിവരങ്ങൾ 1984-ലെ Men of Achievement, Vol. 10, Cambridge, England-ലും 1985-ലെ International Who’s Who of Intellectuals, Vol. 6 Cambridge-ലും 1986-ലെ International Directory of Distinguished Leadership, First Edition, USA-ലും ഉൾപ്പെടുത്തിയിട്ടുണ്ട്. Reference Asia Vol. 2 (1986), Vol. 4 (1989), Biography International, Delhi (1993) എന്നിവയിലും, അഖില വിജ്ഞാനകോശം, ഡിസി ബുക്സ്, കോട്ടയം (1989) ഉൾപ്പെടെ നിരവധി മലയാളം, ഇംഗ്ലീഷ് റഫറൻസ് പുസ്തകങ്ങളിലും അദ്ദേഹത്തെക്കുറിച്ചുള്ള വിവരങ്ങൾ പ്രസിദ്ധീകരിച്ചിട്ടുണ്ട്.

മാർ അപ്രേമിന്റെ ഏറ്റവും പ്രധാനപ്പെട്ടതും പണ്ഡിതോചിതവുമായ സംഭാവനകളിലൊന്ന് അദ്ദേഹം സ്വന്തമായി ശേഖരിച്ചിരുന്ന അപൂർവ്വവും പുരാതനവുമായ സുറിയാനി ലിഖിതങ്ങളുടെ (മാനുസ്ക്രിപ്റ്റുകളുടെ) വിപുലമായ ശേഖരം ആയിരുന്നു. ‘മാർ അപ്രേം മാനുസ്ക്രിപ്റ്റ്സ്’ എന്ന പേരിൽ ലോകമെമ്പാടുമുള്ള സുറിയാനി പണ്ഡിതരുടെ ഇടയിൽ ഇത് അറിയപ്പെട്ടു. ഈ ശേഖരം സഭാചരിത്രത്തിന്റെയും സുറിയാനി ഭാഷാ പഠനത്തിന്റെയും ഗവേഷണ മേഖലയിൽ ഒരു മുതൽക്കൂട്ടാണ്.

യേശുക്രിസ്തുവിൻ്റെ കാലത്ത് പലസ്തീനിലെ ഒരു സംസാരഭാഷയായ അരമായ്ക് ഭാഷ പഠിച്ച്, ശ്രീനാരായണ ഗുരു 100 വർഷം മുമ്പ് രചിച്ച ദൈവദശകം എന്ന ശ്ലോകം ആ ഭാഷയിലേക്ക് മാർ അപ്രേം തിരുമേനി തർജ്ജമ ചെയ്തിട്ടുണ്ട് എന്നത്, അദ്ദേഹത്തിന്റെ ഭാഷാപരമായ പ്രാവീണ്യത്തെയും മതസൗഹാർദ്ദപരമായ കാഴ്ചപ്പാടിനെയും വെളിപ്പെടുത്തുന്നു.

മാർ അപ്രേം മെത്രാപ്പോലീത്തയുടെ ജീവിതം കേവലം അക്കാദമികവും ആത്മീയവുമായ ഔന്നത്യങ്ങളിൽ ഒതുങ്ങിയില്ല. അദ്ദേഹം ലാളിത്യത്തിന്റെയും എളിമയുടെയും ഉത്തമമാതൃകയായിരുന്നു. പാണ്ഡിത്യത്തിലും പദവിയിലും ഉന്നതനായിരുന്നിട്ടും, ആഢംബരങ്ങളിൽനിന്നും ഭൗതിക സുഖങ്ങളിൽനിന്നും അകന്ന്, ഒരു സാധാരണക്കാരനെപ്പോലെ ജീവിക്കാനാണ് അദ്ദേഹം എന്നും ഇഷ്ടപ്പെട്ടത്. വസ്ത്രധാരണത്തിലായാലും ഭക്ഷണത്തിലായാലും യാത്രകളിലായാലും അനാവശ്യമായ ആർഭാടങ്ങൾ ഒഴിവാക്കാൻ അദ്ദേഹം ശ്രദ്ധിച്ചു. “ആർക്കും പ്രാപ്യമായ വ്യക്തിത്വം” എന്ന വിശേഷണം അദ്ദേഹത്തിൻ്റെ ലാളിത്യത്തെയും എളിമയെയും ജനങ്ങളോടുള്ള അടുപ്പത്തെയും എടുത്തു കാണിക്കുന്നു.

സഭകൾ തമ്മിലുള്ള ഐക്യം മാർ അപ്രേം തിരുമേനിയുടെ എക്കാലത്തെയും വലിയ സ്വപ്നമായിരുന്നു. എക്യുമെനിക്കൽ രംഗത്തെ അദ്ദേഹത്തിന്റെ പ്രവർത്തനങ്ങൾ ശ്രദ്ധേയമായിരുന്നു. മലങ്കര ഓർത്തഡോക്സ് സഭയുമായുള്ള സഹകരണം പ്രത്യേകം പ്രസ്താവ്യമാണ്. സഭയുടെ നിരവധി പ്രോഗ്രാമുകളിൽ അഭിവന്ദ്യ പിതാവിൻ്റെ സാന്നിധ്യവും സന്ദേശവും ശ്രദ്ധേയമായി, 1985 ൽ മലങ്കര സഭയുടെ കുന്നംകുളം മെത്രാസനത്തിന്റെ ഉദ്ഘാടനകർമ്മത്തിൽ വിശിഷ്ടാതിഥിയായി അഭിവന്ദ്യ തിരുമേനി ക്ഷണിക്കപ്പെട്ടതും ഈ ഐക്യദാർഢ്യത്തിന്റെ ഉദാഹരണങ്ങളാണ്.

2015-ൽ മാറൻ മാർ ദിൻഹ നാലാമൻ പാത്രിയർക്കീസ് ബാവയുടെ നിര്യാണത്തെത്തുടർന്ന് കുറഞ്ഞ കാലയളവിലെങ്കിലും, ആ സഭയെ ആഗോളതലത്തിൽ നയിക്കാൻ തിരുമേനിക്ക് ഭാഗ്യം ലഭിച്ചു എന്നത് ആഗോള ക്രൈസ്തവ സമൂഹത്തിൽ അദ്ദേഹത്തിനുണ്ടായിരുന്ന വലിയ അംഗീകാരത്തെയും വിശ്വാസത്തെയും അടിവരയിടുന്നു. ഇന്ത്യയിലുടനീളമുള്ള നിരവധി മത-സാമൂഹിക സംഘടനകളിൽ അദ്ദേഹം സജീവമായിരുന്നു.

തൃശ്ശൂരിലെ സാമൂഹിക-സാംസ്കാരിക പരിപാടികളിലെ ഒഴിച്ചുകൂടാനാവാത്ത സാന്നിധ്യമായിരുന്ന അദ്ദേഹം, ഭാഷാപണ്ഡിതൻ, സരസ പ്രഭാഷകൻ, സാമൂഹ്യ പരിഷ്കർത്താവ്, ലോകനേതാക്കളുമായും എല്ലാ ക്രൈസ്തവ മേലധ്യക്ഷന്മാരുമായും വ്യക്തിപരമായ ബന്ധം പുലർത്തിയ മഹാത്മാവ് എന്നിങ്ങനെ വിവിധ നിലകളിൽ അദ്ദേഹം ശോഭിച്ചു. എട്ട് ഭാഷകൾ ഹൃദിസ്ഥമായിരുന്ന തിരുമേനി, അറിവിന്റെ അതിരുകൾ ഭേദിച്ച് ലോകത്തിന് ഒരു മാതൃകയായി. ഇന്ത്യയിലും വിദേശത്തും നിരവധി വേദികളിൽ അദ്ദേഹം പ്രഭാഷണങ്ങൾ നടത്തുകയും സെമിനാറുകൾ നയിക്കുകയും ചെയ്തിട്ടുണ്ട്. പണ്ഡിതന്മാരുടെ ചെറിയ കൂട്ടായ്മകളിലും സാധാരണ ജനങ്ങൾക്കിടയിലും വലിയ സമ്മേളനങ്ങളിലും അദ്ദേഹം ഒരുപോലെ സഹവസിച്ചു.

മാർ അപ്രേം മെത്രാപ്പോലീത്ത, ഒരു ആത്മീയ നേതാവിനെക്കാൾ വളരെ മികച്ചൊരു വ്യക്തിത്വമായിരുന്നു. അദ്ദേഹം സഭാചരിത്രത്തിന്റെ ഗംഭീരതയെയും ദൈവത്തോടുള്ള ഭക്തിയെയും ജീവിതത്തിന്റെ ഹാസ്യവീക്ഷണത്തെയും സാഹിത്യത്തിന്റെ വൈവിധ്യമാർന്ന രൂപങ്ങളിലൂടെ പൊതുജനങ്ങളിലേക്കും പണ്ഡിതരിലേക്കും എത്തിച്ചു. അദ്ദേഹത്തിന്റെ ഏഴുപതിലധികം കൃതികൾ, പല ഭാഷകളിലേക്കുള്ള വിജയകരമായ തർജ്ജമകൾ, അന്താരാഷ്ട്ര തലത്തിലുള്ള അംഗീകാരങ്ങൾ, പ്രത്യേകിച്ചും അപൂർവ്വമായ സുറിയാനി ലിഖിതശേഖരം എന്നിവയെല്ലാം, ശാസ്ത്രീയമായി സൂക്ഷ്മതയുള്ളതും ആത്മീയതയാൽ പ്രചോദിതവുമായ ബഹുമുഖ പ്രതിഭയുടെ ജീവിതസാക്ഷ്യം വഹിക്കുന്നു. അസ്സീറിയൻ സഭയുടെ ചരിത്രവും സാംസ്കാരിക പൈതൃകവും രേഖപ്പെടുത്തുന്നതിലും അവയെ ലോകത്തിന് മുന്നിൽ ഹാജരാക്കുന്നതിലും അദ്ദേഹം നിർവ്വഹിച്ച പങ്ക് അമൂല്യവും നിത്യസ്മരണീയവുമാണ്.

ലാളിത്യം, പാണ്ഡിത്യം, സാമൂഹിക പ്രതിബദ്ധത, എക്യുമെനിക്കൽ കാഴ്ചപ്പാട് എന്നിവയുടെ സമന്വയമായിരുന്ന മാർ അപ്രേം മെത്രാപ്പോലീത്തയുടെ അസാന്നിദ്ധ്യം, ഇന്ത്യൻ ക്രൈസ്തവ സമൂഹത്തിനും, വിജ്ഞാനലോകത്തിനും, സഭാചരിത്രപഠനത്തിനും, എക്യുമെനിക്കൽ പ്രസ്ഥാനങ്ങൾക്കും, മത- മാനവ സൗഹാർദ്ദത്തിനും അപരിഹാര്യമായ നഷ്ടമായി എന്നും നിലകൊള്ളും. ആ പിതാവിൻ്റെ ധന്യജീവിതവും പരിവർത്തനചിന്തകളും വരും തലമുറകൾക്ക് എന്നും പ്രചോദനമായിരിക്കും.

പണ്ഡിതനായ ആ ഗുരുവര്യൻ്റെ വിയോഗത്തിൽ, സഭാചരിത്ര ഗവേഷണത്തിൽ വ്യക്തിപരമായ അടുപ്പം സൂക്ഷിച്ചിരുന്ന ഈ എളിയശിഷ്യൻ്റെ സ്നേഹബാഷ്പാഞ്ജലികൾ പ്രാർത്ഥനാപൂർവ്വം സമർപ്പിക്കുന്നു.

ഫാദർ ഡോ. സണ്ണി ചാക്കോ

കുന്നംകുളം

All reactions: