ഭര്‍ത്താവ് വാഹനം പാർക്ക് ചെയ്യുന്നതിനിടെ വാഹനം ഇടിച്ച് വീട്ടമ്മയ്ക്ക് ദാരുണാന്ത്യം
അജ്‌മാൻ (UAE ): കാർ പാർക്ക് ചെയ്യുവാൻ ഭര്‍ത്താവിനെ സഹായിക്കുന്നതിനിടെ മലയാളി വീട്ടമ്മയ്ക്ക് ദാരുണാന്ത്യം. തൃശൂര്‍ കൈപമംഗലം സ്വദേശി ഷാന്‍ലിയുടെ ഭാര്യ ലിജി(45) ആണ് മരിച്ചത്. അജ്മാനിലെ ആശുപത്രിയിൽ പാര്‍ക്കിങ് സ്ഥലത്തായിരുന്നു സംഭവം. ആശുപത്രിയില്‍ പരിശോധനയ്ക്ക് എത്തിയതായിരുന്നു ദമ്പതികള്‍. ലിജി മുന്നില്‍ നിന്ന് കാർ പാര്‍ക്ക് ചെയ്യുവാന്‍ ഭര്‍ത്താവിനെ സഹായിക്കുകയായിരുന്നു.
പെട്ടെന്ന് ബ്രേക്കിന് പകരം ഭര്‍ത്താവ് അബദ്ധത്തിൽ ആക്‌സിലേറ്റര്‍ ചവിട്ടിയതാണ് അപകടത്തിന് കാരണമെന്നാണ് സൂചന. ഇതോടെ കാർ പെട്ടെന്ന് മുന്നോട്ടു കുതിക്കുകയും ലിജി വാഹനത്തിനും ചുമരിനുമിടയില്‍പ്പെട്ട് ഞെരിഞ്ഞമരുകയുമായിരുന്നു. സംഭവ സ്ഥലത്ത് തന്നെ മരണം സംഭവിച്ചു.
ഏറെ വര്‍ഷമായി ദമ്പതികള്‍ യുഎഇയിലാണ് താമസിക്കുന്നത്. ലിജിയുടെ മൃതദേഹം നാട്ടിലേയ്ക്ക് കൊണ്ടുപോകാനുള്ള നടപടികൾ പുരോഗമിക്കുന്നു. ദമ്പതികളുടെ മൂത്തമകൻ പ്രണവ് തൃശൂർ വിദ്യാ എൻജിനീയറിങ് കോളേജിൽ എൻജിനീയറിങ്ങിനും മകൾ പവിത്ര ഉം അൽ ഖുവൈന് സ്കൂളിലും പഠിക്കുന്നു.
കുറിപ്പ്: എപ്പോഴും, ആരായാലും, എവിടെയായാലും, വാഹനം പാർക്ക് ചെയ്യുമ്പോൾ വാഹനത്തിന്റെ മുന്നിലോ പിന്നിലോ നിന്ന് പാർക്ക് ചെയ്യുവാൻ സഹായിക്കരുത്. Side ൽ (ഏതെങ്കിലും ഒരു വശത്തു) നിന്നേ പാർക്ക് ചെയ്യുവാൻ സഹായിക്കാവൂ