ഒറ്റ പ്രസവത്തില്‍ പത്ത് കുഞ്ഞുങ്ങള്‍; ലോക റെക്കോര്‍ഡിലേക്ക് ദക്ഷിണാഫ്രിക്കന്‍ വീട്ടമ്മ
ദക്ഷിണാഫ്രിക്കന്‍ വീട്ടമ്മ ഒറ്റ പ്രസവത്തില്‍ 10 കുഞ്ഞുങ്ങള്‍ക്ക് ജന്മം നല്‍കിയതായി റിപ്പോര്‍ട്ട്. 37കാരിയായ ഗോസിയാമെ തമാരാ സിതോള്‍ ആണ് ഈ അവകാശവാദവുമായി രംഗത്തെത്തിയത്.
ഇക്കാര്യം ഔദ്യോഗികമായി സ്ഥിരീകരിച്ച ശേഷം ലോക റെക്കോര്‍ഡായി പ്രഖ്യാപിക്കുമെന്ന് ഗിന്നസ് ബുക്ക് അധികൃതര്‍ പറഞ്ഞു. കഴിഞ്ഞ മാസം ഒറ്റ പ്രസവത്തില്‍ ഒമ്ബത് കുഞ്ഞുങ്ങള്‍ക്ക് ജന്മം നല്‍കിയ മൊറോക്കോയിലെ മലിയാന്‍ ഹലീമ സിസ്സെയുടെ പേരിലാണ് നിലവിലെ റെക്കോര്‍ഡ്.
എട്ട് കുട്ടികളുണ്ടാകുമെന്നായിരുന്നു സിതോളിന്‍റെ സ്‌കാനിങ് റിപ്പോര്‍ട്ട്. എന്നാല്‍, ഏഴ് മാസവും ഏഴ് ദിവസവും ആയപ്പോള്‍ അവര്‍ പത്ത് കണ്‍മണികള്‍ക്ക് ജന്മം നല്‍കുകയായിരുന്നു. ഏഴ് ആണ്‍കുട്ടികളും മൂന്ന് പെണ്‍കുട്ടികളുമാണ് സിസേറിയനില്‍ ജനിച്ചത്. ഇവര്‍ക്ക് ആറ് വയസ്സുള്ള ഇരട്ടകുട്ടികളുമുണ്ട്. ദക്ഷിണാഫ്രിക്കയിലെ ഗോതെംഗ് സ്വദേശിയായ സിതോള്‍ ഗര്‍ഭസംബന്ധമായ ചികിത്സകളൊന്നും തേടിയിരുന്നില്ലെന്ന് ഭര്‍ത്താവ് തെബോഹോ സുതെത്‌സി പറഞ്ഞു. ‘ഞാനാകെ സന്തോഷത്തിലാണ്. ഞാനാകെ വികാരാധീനനാണ്’- അദ്ദേഹം പറഞ്ഞു.
