ഊണു കഴിയ്കുന്നതിനും ചില ചിട്ടവട്ടങ്ങളുണ്ട്.| 10 ഊണുനിയമങ്ങൾ.
ഊണു കഴിയ്കുന്നതിനും ചില ചിട്ടവട്ടങ്ങളുണ്ട്… ദാ, 10 ഊണുനിയമങ്ങൾ….
1. ചൂടോടെ ഉണ്ണണം :-ചൂടുചോറിനേ രുചിയുളളൂ. അത് വയറിലെ ദഹനശക്തിയെ നിലനിർത്തുന്നു. ഉണ്ടത് ശരിയായി ദഹിക്കുകയും ചെയ്യുന്നു
.2. മയമുളളതുണ്ണണം :-മയമുളളതിനേ രുചിയുളളൂ. അത് വയറിലെ ദഹനപേശികളെ ശക്തിപെടുത്തുന്നു. ശരീരത്തെ പോഷിപ്പിക്കുന്നു. കണ്ണ് മുതലായ ഇന്ദ്രിയങ്ങളെ കരുത്തുളളവയാക്കുന്നു. ദേഹത്തിന് സ്വാഭാവികമായ കാന്തിയുണർത്തുന്നു.
3. അളവറിഞ്ഞുണ്ണണം :-അളവറിഞ്ഞ് ഭക്ഷണംകഴിച്ചാൽ ദേഹത്തിൽ വാത-പിത്ത കഫങ്ങളുടെ സംതുലനാവസ്ഥ തകരാറിലാവാതെ ആയുസ്സ് വർദ്ധിപ്പിക്കുന്നു. നീരുംചണ്ടിയും വേർതിരിഞ്ഞ് വേണ്ടാത്തത് പുറത്തുപോകുന്നു.
4. ദഹിച്ചശേഷമുണ്ണണം :-ആദ്യംകഴിച്ചത് ശരിയായി ദഹിക്കുംമുമ്പ് വീണ്ടുമുണ്ടാൽ പലമട്ട് പാകംവന്ന നീരുകൾ (ദഹനരസം) കൂടിക്കലർന്ന് ശരീരത്തിന്റെ സുസ്ഥിതി അവതാളമാകും.
5. വിരുദ്ധമാവാത്തതുണ്ണണം :-കഴിക്കുന്ന സാധനങ്ങൾതമ്മിൽ ഒന്നിനൊന്ന് വൈരുദ്ധ്യമുണ്ടാവരുത്.. വിരുദ്ധങ്ങളായവ ശരീരത്തിൽ വിഷാംശമുണ്ടാക്കും. ശരീരസ്ഥിതി അപകടത്തിലാവും. ഉദാഹരണത്തിന് പുളിയുളള പഴങ്ങളും പാലും ഒരുമിച്ചാവരുത്. ചൂടുചോറിൽ തൈരു ചേർക്കരുത്.
6. സുഖമായിരുന്നുണ്ണണം :-മനസ്സിനു സമാധാനവും പ്രസാദവും ഉണ്ടെങ്കിലേ കഴിക്കുന്നത് പ്രയോജനത്തിലാവൂ. വെറുപ്പോടെ ഇരുന്നുണ്ടാൽ വകയ്ക്കുകൊളളില്ല.
7. തിടുക്കത്തിലുണ്ണരുത് :-വേഗംകൂടിയാൽ ചോറുവഴിമാറും. ശരിക്കിറങ്ങാത്ത പോലെ തോന്നുകയും ചെയ്യും. രുചിയറിയുകയേയില്ല. ദോഷവുമറിയില്ല.
8. തീരെപ്പതുക്കെയുണ്ണരുത് :-ഏറെപ്പതിഞ്ഞമട്ടായാൽ വയറുനിറയുന്നതറിയില്ല. അധികമുണ്ടുപോകും. കിണ്ണത്തിലെ ചോറ് ഇരുന്നാറും. ദഹനം ക്രമം വിട്ടാവും.
9. മിണ്ടിയും ചിരിച്ചുമുണ്ണരുത് :-ഉണ്ണുമ്പോളതിലാവണം ശ്രദ്ധ. മനം മറ്റൊന്നിലായാൽ അതിവേഗമുണ്ടാലത്തെ കുഴപ്പങ്ങൾ എല്ലാമുണ്ടാകും.
10. അവനവനെ അറിഞ്ഞുണ്ണണം :-ഊണിനുളളതിൽ ഇതെനിക്കു നന്ന് ഇതാപത്ത് എന്ന് തിരിച്ചറിഞ്ഞ് വേണ്ടതെന്നുളളതേ ഉണ്ണാവൂ.