ഒരു ഇതിഹാസത്തിൽ മുങ്ങിത്താന്ന പ്രതീതിയാണ് ചിലരുടെ ജീവിതകഥകൾ നമ്മിൽ സൃഷ്ടിക്കുന്നത്. അവർ നടന്നുവന്ന ഇരുൾമൂടിയ അഗ്നിപഥങ്ങൾ വിസ്മയത്തുമ്പത്തെത്തിക്കുന്നതോടൊപ്പം നമ്മെ അനിർവചനീയമായ ഒരു ജീവിതദർശനത്തിന്റെ കാൽച്ചുവട്ടിൽ തളച്ചിടുന്നു. സങ്കല്പിക്കാത്തതു സങ്കല്പിക്കുകയും പ്രവർത്തിക്കാത്തത് പ്രവർത്തിക്കുകയും ചെയ്തുകൊണ്ട് പുതിയൊരു ഭാവുകത്വത്തിന്റെ അദ്ധ്യാസനക്കാരായി ചരിത്രത്തിന്റെ ലാവണ്യസങ്കല്പങ്ങളെ തിരുത്തിയെഴുതുന്നവർ. ഇവർ വരച്ചിടുന്ന സ്വാർത്ഥരഹിതമായ ജീവിതത്തിന്റെ സുവർണലിപികൾ വായിച്ചുമനസ്സിലാക്കുവാൻ നാം തപസ്സിരിക്കണം. അണയാത്ത ക്ലേശങ്ങളുടെ മുഖത്തുനോക്കി സധൈര്യം മുന്നോട്ടുകുത്തിച്ച ഇവരുടെ കഥകൾ കേൾക്കുമ്പോൾ, കഷ്ടപ്പാടുകളിലൂടെ അവതീർണമാക്കപ്പെടുന്ന ഇതിഹാസജീവിതങ്ങളുടെ ചൂടും ചൂരും നിറഞ്ഞ പാതയോരത്താണ് നാം എത്തിച്ചേരുന്നത്. […]