ഫിലിം സിറ്റിക്ക് കോതമംഗലത്ത് സ്ഥലം കണ്ടെത്തണം: ജില്ലാ വികസന സമിതി യോഗത്തിൽ ഷിബു തെക്കുംപുറം എംഎൽഎ
കൊച്ചി . ബജറ്റിൽ പ്രഖ്യാപിച്ച ഫിലിം സിറ്റിക്കായി കോതമംഗലത്ത് ഭൂമി കണ്ടെത്തണമെന്ന് ഷിബു തെക്കുംപുറം എം.എൽ.എ. ആവശ്യപ്പെട്ടു. കളക്ടറേറ്റ് കോൺഫറൻസ് ഹാളിൽ ചേർന്ന ജില്ലാ വികസന സമിതി യോഗത്തിലാണ് അദ്ദേഹം ഈ ആവശ്യം ഉന്നയിച്ചത്.
ജില്ലയിൽ ഫിലിം സിറ്റി നടപ്പാക്കുന്നതിനായി ഭൂമി കണ്ടെത്തുന്നതിനുള്ള നടപടികൾ പുരോഗമിക്കുകയാണെന്ന് ജില്ലാ കളക്ടർ ജി. പ്രിയങ്ക പറഞ്ഞു. ഇതിനായി ഭൂമി കൈവശമുള്ള വിവിധ വകുപ്പുകളുടെയും ബന്ധപ്പെട്ട ഉദ്യോഗസ്ഥരുടെയും അടിയന്തര യോഗം ഉടൻ വിളിച്ചുചേർക്കുമെന്നും ജില്ലാ കളക്ടർ അറിയിച്ചു.
കോട്ടപ്പടി, കീരംപാറ, പിണ്ടിമന എന്നിവിടങ്ങളിലെ സോളാർ ഫെൻസിങ് നടപടികൾ വേഗത്തിൽ പൂർത്തിയാക്കണമെന്നും കോതമംഗലം എംഎൽഎ ആവശ്യപ്പെട്ടു.
ഏഴിപ്പുറം സെറ്റിൽമെന്റ് കോളനിയിലെ പട്ടികജാതി വിഭാഗക്കാർക്കായി നിർമ്മിച്ച കമ്മ്യൂണിറ്റി ഹാൾ പരിസരത്തെ മാലിന്യങ്ങൾ ഒരാഴ്ചയ്ക്കകം നീക്കം ചെയ്യാൻ കുന്നത്തുനാട് എം.എൽ.എ. വി.പി. സജീന്ദ്രന്റെ ആവശ്യപ്രകാരം ജില്ലാ കളക്ടർ നിർദ്ദേശം നൽകി. പ്രദേശത്ത് മെറ്റീരിയൽ കളക്ഷൻ ഫെസിലിറ്റിക്കുള്ള (എം.സി.എഫ്.) സ്ഥലം അനുവദിച്ചു നൽകാനും യോഗത്തിൽ തീരുമാനമായി.
സ്കൈലൈൻ പാംടോപ്പ് അപാർട്മെന്റുകളിലെ കിണറുകളിൽ കെമിക്കലുകളുടെ സാന്നിധ്യവും വെള്ളത്തിന്റെ ദുർഗന്ധവും രുചിവ്യത്യാസവും കണ്ടതിനെ തുടർന്ന്, മലിനീകരണത്തിന്റെ ഉത്ഭവം കണ്ടെത്തി പ്രശ്നം അടിയന്തരമായി പരിഹരിക്കണമെന്ന് ഉമാ തോമസ് എംഎൽഎ ആവശ്യപ്പെട്ടതിൻ്റെ അടിസ്ഥാനത്തിൽ വെള്ളത്തിന്റെ സാമ്പിളുകൾ പരിശോധിച്ച് രണ്ടാഴ്ചയ്ക്കകം റിപ്പോർട്ട് നൽകാൻ പൊല്യൂഷൻ കൺട്രോൾ ബോർഡിനോട് കളക്ടർ നിർദ്ദേശിച്ചു.
മട്ടാഞ്ചേരിയിലേക്കുള്ള ജങ്കാർ, ബോട്ട് സർവീസുകൾ പുനഃസ്ഥാപിക്കണമെന്ന കൊച്ചി എം.എൽ.എ മുഹമ്മദ് ഷിയാസിന്റെ ആവശ്യത്തിൽ ഉടനടി നടപടിയുണ്ടാകുമെന്ന് യോഗം ഉറപ്പുനൽകി.
കൊച്ചി കോർപ്പറേഷൻ പരിധിയിലുള്ള ബീച്ചുകളിൽ പ്രവർത്തനരഹിതമായ സ്ട്രീറ്റ് ലൈറ്റുകൾ പ്രവർത്തനക്ഷമമാക്കാനും മഴയെത്തുടർന്ന് റോഡുകളിൽ രൂപപ്പെട്ട കുഴികൾ ഓണാഘോഷങ്ങൾക്ക് മുൻപായി അടച്ചു തീർക്കാനും, പട്ടയം തരംമാറ്റ നടപടികൾ വേഗത്തിലാക്കുന്നതിനും വികസന സമിതി യോഗത്തിൽ തീരുമാനമായി.
ജില്ലാ പ്ലാനിങ് ഓഫീസർ ടി. ജ്യോതിമോൾ, അഡീഷണൽ ജില്ലാ മജിസ്ട്രേറ്റ് കെ. മനോജ്, ഡി.എഫ്.ഒ. കാർത്തിക് പനീർ, ഡെപ്യൂട്ടി കളക്ടർമാർ, വിവിധ വകുപ്പുകളുടെ ജില്ലാതല ഉദ്യോഗസ്ഥർ തുടങ്ങിയവർ യോഗത്തിൽ പങ്കെടുത്തു.